Bername di bin koordînasyona Serokatiya Yekitiya Ewropayê ya Wezareta Karên Derve de, bi piştgiriya darayî ya Yekitiya Ewropayê, bi rêveberiya Fona Nexweşiyên Neteweyên Yekbûyî (UNFPA) û bi hevkariya Yekitiya Şaredariyên Tirkiyeyê (TBB) di çarçoveya qonaxa sêyemîn a Bernameya Bajarên Jindost (KDK) de dest pê kir. Di çarçoveya bernameyê de ku wê sibê bi dawî bibe, ji bo xebatkarên Şaredariya Bajarê Mezin a Amedê û nûnerên Koma Civaka Sivîl a Bajarên Jindost ên li bajêr, Perwerdehiya Plana Çalakiyê ya Wekheviya Herêmî hat dayîn.

Xebatkarên şaredariyê û nûnerên Koma Civaka Sivîl a Bajarên Jindost ên Amedê beşdarî bernameya perwerdeyê bûn. Bi vê bernameyê re xurtkirina wekheviya jin û mêran a di asta herêmî de, zêdekirina kapasîteya saziyî ya şaredariyan û xurtkirina mekanîzmayên wekheviya herêmî bi şêwazekî mayinde hat armanckirin.

Perwerdeyên qonaxa yekemîn û duyemîn ên serhêl (online) ên Bernameya Bajarên Jindost di navbera mijdara 2025’an û adara 2026’an de bi dawî bûn. Piştî van qonaxan, di çarçoveya qonaxa sêyemîn a perwerdehiyên rûbirû de bernameyek hat amadekirin. Di vê bernameyê de; rêbaz, amûr û nexşeyên rê yên ku ji bo şaredarî û rêxistinên civaka sivîl bikaribin pêvajoyên Plana Çalakiyê ya Wekheviya Herêmî bi hev re sêwirînin, bi bînin cih û bişopînin, hatin nirxandin.

Perwerdehî ji aliyê Pisporên Sereke yên Bernameya Bajarên Jindost Sezin Uskent û Zehra Tosun ve hatin meşandin. Di roja yekemîn a bernameyê de pênase, girîngî û prensîbên bingehîn ên Planên Çalakiyê yên Wekheviya Herêmî (YEEP) hatin destgirtin; her wiha xebatên li ser plansaziya pêvajoya YEEP’ê, analîza rewşa heyî û analîza pirsgirêkan hatin kirin. Di nava rojê de her wiha li ser pêvajoyên pênasekirina hedef û çalakiyan û diyarkirina lîsteya pêşîniyan hat sekinandin û li gel beşdaran nirxandinên pratîkî hatin kirin.

Di roja duyemîn a bernameyê de jî wê pêvajoyên şopandin, nirxandin, raporkirin û hînbûnê werin destgirtin. Her wiha pêvajoya pejirandina YEEP’ê, ragihandina YEEP’ê, entegrasyona Planên Çalakiyê yên Wekheviya Herêmî di nav planên stratejîk ên şaredariyan de û pêvajoyên pêkanîn, koordînasyon û revîzyonê werin nirxandin. Di çarçoveya perwerdehiyê de her wiha li ser girîngiya Mekanîzmayên Wekheviya Herêmî û rolên wan ên di pêvajoya YEEP’ê de nîqaş werin kirin û li ser nexşeya rê ya ji bo xurtkirina Mekanîzmayên Wekheviya Herêmî yên li Amedê, nirxandinên hevpar werin kirin.

Di çarçoveya bernameyê de tê plankirin ku di pêvajoya pêş de li Amedê xebatên ji bo xurtkirina Mekanîzmayên Wekheviya Herêmî, pêşvebirina amadekariyên Plana Çalakiyê ya Wekheviya Herêmî û geşkirina hevkariyên di navbera şaredarî û civaka sivîl de berdewam bikin.