Serokatiya Daîreya Zabiteyan û tîmên zabita yên Şaredariya Sûrê, bi armanca xurtkirina çanda jiyana hevpar a li Sûriça dîrokî, parastina qadên giştî û dabînkirina derbasbûna ewle ya peyayan, kontrolên xwe didomînin.

Li xebatên ku li ser rêyên herî qelebalix ên peyayan ên navçeyê hatin kirin, rê nayê dayîn ku kargeh hilberên xwe ji sînorên firotanê yên diyarkirî dertînin û destwerdan li çalakiyên firoşkarên gerok ên ku peyaran dagir dikin jî tê kirin. Di kontrolan de tê dîtin ku xebatên li ser bingeha diyaloga bi esnaf û welatiyan re hatine meşandin, encamên erênî dane.

Peyarêk dîsa ji bo bikaranîna welatiyan hatin vekirin

Piştî xebatên agahdarkirin û hişyarkirinê yên hefteyên borî, gelek kargehan hilberên xwe kişandin hundirê sînorên diyarkirî û peyarêk dîsa ji bo bikaranîna peyayan hatin vekirin. Bi rakirina dezgehên firoşkarên gerok re, bi taybetî li ser rêyên qelebalix, derbasbûna peyayan ewletir û birêkûpêktir bû.

Tîm di kontrolan de bi bîr tînin ku peyar ne qadên çalakiya bazirganiyê ne, lê qadên giştî yên xwedî bikaranîna hevpar a welatiyan in û balê dikişînin ser giringiya parastina gihîştina peyayan ji bo jiyana bajêr.

Armanc parastina qadên jiyana hevpar e

Rayedarên zabiteyan dan zanîn ku xebat ne li ser bingeha cezakirinê ne, lê bi armanca dabînkirina nîzama bajêr û xurtkirina çanda jiyana hevpar tên meşandin. Hat diyarkirin ku bersivdana hişyariyan cihê kêfxweşiyê ye û hat teqezkirin ku pabendbûna esnafan a li gorî rêgezên diyarkirî, hem beşdarî estetîka bajêr hem jî ewlehiya peyayan dibe.

Kontrol dê bê navber berdewam bikin

Tîmên zabiteyan ku di nava rojê û demên êvarê de jî li qadê wezifedar in, ji bo ku li ser peyarêkan dîsa dagirkirin çênebe kontrolên xwe yên birêkûpêk didomînin. Şaredariya Bajarê Mezin a Amedê û Şaredariya Sûrê, li gorî armanca bajarekî ewletir, hêsantir û bikêrtir, dê xebatên xwe yên kontrol û agahdarkirinê yên ji bo parastina qadên giştî, bi taybetî li Sûriçê, berdewam bikin.