Sayeya Yurdê Kênayan resa Fakulteya Tibî qezenç kerd

Yurdê Kênayan Şaredarîya Bajarê Girdî ya Dîyarbekirî ser o xizmet dana kênayanê ke tax û dewna ra yenê û nînan ra Semanur Yalçine ke uca de perwerde girewtêne seyaya ina xizmete Fakulteya Tibî ya Unîversîteya Dîcle qezenç kerd û resa xeyalê xo ser.

Yurdê Kênayan Serekîya Dayîreyê Xizmetanê Ciwan û Sporî ya Şareadrîya Girdî ser o xebatan kena û deme perwerdeyî de kênayan rê hem perwerde dÎyena hem zî înan hewînena.

Yurdê kênayan de xizmet dîyena kênayanê dezavantajînan û ê amadeye îmtîhananê TYT û AYTyî bîyî û îmtÎhan de serkewtîşêko weş mojnayî.

Yurd de kişta dersxaneyan, kitabxane, odeyanê computure û satrançî, Serwîsê Mişawirîye Psîkolojîk û Rayberîye de hewte de 7 roje xizmet dîya kênaya.

Wendekara Yurdê Kênayan Semanur Yaliçe ke 18 serrî de ya, Fakulteya Tibî ya Unîversîteya Dîcle qezenç kerd û resa xeyalê xo ser.

Semanur qezaya Licê dewa Melê Haso de ronişena û wayîrê 5 wa û bira ya aye ra zî uca de îmkanê xo çinebi û Yurdê Kênayan ra îstîfade kerdêne.

Wakilî Semanurî ra yew şina Doxtorîya Didonan yew zî Fakulteya Veterînerî de wanena aye zî xo ra wakilî xo nimune girewta.

Keye de Îmkanê mi çinebi ke ez bixebita

Semanurî da zanayene ke keyê de îmkanê xo çinebi ke bixebita û wina vat:

“Deme de îmkananê ma zaf kêm ê. Zimistanî zaf ser o, hamnanî de zî zaf germ a. Ma debara xo bi heywankarÎ kenê aye ra zî kar Û güre ma zaf ê. Ma tîya de maya xo reyde şîyene axur û werd powtêne, firqa şutêne. Ma datê xo reyde cuyenê ay era zî ma zaf qerebalix bi û îmkanê mi çinebi ke ez keye de ders bikera.”

Semanurî da zanayene ke sayeya Yurdê Kênayan de aver şîya û badê qalîkerdişê xo wina domna:

“Ez yurd de odeyêk de teyna bi. Mi teberê saetanê etûtî de zî şikîna odeya xo de bixebita.Yurd sey keye bi.Mamostayî ma za baş bi.Îmkanane ma zaf baş bi û mamostayî ma perse ma ra zî zaf eleqeder bîyêne.Mi hewte de di hîrê kitab qedînêne.”

Semanur resayîşê xeyalê xo ver keyfweşîyê xo ard ziwanê xo ser û da zanayene ke a wazena biba doxtor û feydeyê aye wa biresa hemwelatê xo.

Semanur kênayan rê pêşnîyaz kena ke wa ê zî zaf bixebitê û kesê ke tax û dewan de îmkananê înan çine wa Yurdê Kênayan ra îstîfade bikerê.

 Babîyê Semanure Feyzî Yalçinî zî keyfweşîyê xo ard ziwanê xo ser û wina vat:”Keyeyê ma zaf qerebalix o, îmkananê ma çin ê, aye ra zî ma kênaya xo erşawit Yurdê Kênayan.Ma zaf keyfweş mend.Homa razî bo çi deste înan ra amey ê texsîr nêkerd.”

Xizmeta sey keye

Midurê Xizmetanê Spor û Ciwanî Bîlal Şen, da zanayene ke Yurdê Kênayan de kênayanê ke îmkananê înan çin ê, eşkenê îstÎfade bikerê.Yurdê kênayan de hewte de 7 roje hem ders dÎyena kênayan hem zî înan hewînena.

Şen da zanayene ke her serre yurdê kênayan ra 120 kênayî îstîfade kenê û perwerdeklaran reyde amadeye îmtîhananê unîversîte benê.

Çarçiwa xebatanê sosyal de zî, qepsema projeya Bigeyrê-Bivînê kênayî cayê tarîxî de geyrenê.Şen da zanayene ke tyîyatro ra heta sinema û geyrayîşî bi seyan aktîvîte virazîyo.

Şen da zanayene ke erdlerzo Mereşî ra dima 20 wendekarî ageyrayî dewanê xo û 100 wendekarî ra 60 hebî cîya cîya beşan de unîversîte qezenç kerdê.

Şenî qalîkardişê xo wina domna:

“Dewan de îmkananê kênayanê maç in ê. Zafane keyeyan de 7,10 wa û bira odeyek de yê. Aye ra zî kênayanê ma îmkanê xebitîyayişê derse nêvînena. Yurdê Kênayan semedê kênayanê dezavantajînan sey merkezek o.Ma yurdê kênayan de heme xizmetê xobê pere dana kênayanê xo.Ma wendekarî re sey keyeyanê înan de xizmet danê. “

1041 wendekarî unîversîte qezenç kerd

1041 wendekarî ke Akademî Lîse û Yurdê Kênayan ya Şareadrîya Girdî de wanenê emser serkewtîşêko weş mojnayî Û unîversîte qezenç kerd.