Tesîsê Awguznayîşê Gendawe ya Hênî qedîya

Midurîya Pêroyî yê Awe û Îdareyê Kanalîzasyonî ya Şaredarîya Bajarê Girdî ya Dîyarbekirî(DÎSKÎ) bi şirikîya ÎLBANKî, Tesîsê Awguznayîşê Gendaweya Hênî de xebatanê xo qedînay.

Midurîya Pêroyî ya DÎSKÎ bi hîstenîkîye xozayî hem merkez hem zî qezayan di xebatanê xo domneno.

No qepsam de Midurîya Pêroyî ya DÎSKÎ çarçeweya “Projeya Awa Şimitişî û Kanalîzasyonî”(SUKAP) de qezaya Hênî de Tesîsê Awguznayîşê Gendawe awan kerd.

Tesîs pêroyî de 10 ehnzar metrekare ca ser o ame awankerdiş û tesis de 1183 metre dergi de xeta kolektor, hewzî, odeya bypassî, odeya blowerî, odeya jeneratorî û binaya îdarî estê.

Çemê Dabanî leyminî ra xelisîya

Midurê Pêroyî ya DÎSKÎ Firat Tutşî da zanayene ke vere cû awa pîse şîyêne çemê Dabanî ser la endî awa pîse mîyanê tesîsî de biba pak û dima ra verdîyena çemê Dabanî.

Tesîs do heta serra 2055 lazimtîya qezayî peyda bikero

Tutşî da zanayene ke Tesîsê Awguznayîşê Gendawe do heta serra 2055 heme lazimtîya qezayî peyda bikero û bade tayê xebatan eşkenê emrê tesîsî derg bikerên.

Tutşî muhîmîya awguznayîşê gendawe ser o bal ont û da zanayene ke sayeye nê tesîsan hem çimeyê awe hem zî weşîya hemwelatîyan yena pawitiş.